A partir dau diluns 14 de novembre, Ràdio Nissa Pantai difuserà una nòva cronica setmaniera d’actualitats intitolada “Lo Jornalet” en referéncia a Jornalet, la gaseta occitana d’informacions qu’es lo promier e unic jornal quotidian en occitan sus Internet. L’emission passerà cada jorn per interval de 4 oras (00h00, 04h00, 08h00, 12h00, 16h00 e 20h00. Succedirà a “PantaInfo”, una anciana cronica d’actualitats que Ràdio Nissa Pantai difusava en lu 2012-13.

Eissida d’un novèu partenariat que Nissa Pantai a signat emb l’Associacion entara la Difusion d’Occitània en Catalonha (ADÒC), aquesta iniciativa aurà per tòca d’espandir per audio sus la ràdio lo contengut dau sit d’informacions Jornalet. Serà tanben un biais de promòure lo trabalh remirable  que mènan despí 10 ans la direccion de l’ADÒC per faire viure Jornalet e contribuir ensin a la visibilitat de l’occitan sus Internet en metent en avanç la sieu utilitat en matèria de lenga de comunicacion modèrna. N’aproficham per far remembrar que Jornalet a sempre da besonh d’argent per finançar lo sieu foncionament e que li podèm toi contribuir en contactant Los amics de Jornalet.

Nissa Pantai es encantada d’aquesta nòva collaboracion que renfòrça la sieu preséncia dins lo mitan mediatic occitan. Per remembrança, Ràdio Nissa Pantai coopèra despí de lònga emb Ràdio Lenga d’Òc, Ràdio Occitània e aüra l’ADÒC.

Per mai d’informacions, podètz contactar dirèctament Nissa Pantai:

  • Per telefòn au 06 46 62 74 93
  • Per corrièl a info@nissapantai.org

Vos convidam d’escotar Ràdio Nissa Pantai sus Internet e mai sus Androïd gràcia a la nòstra aplicacion per esmartfòns.