Cu siam?

NISSA PANTAI

Centre Cultural Occitan

País Nissart e Alpenc

Associacion Lei 1901

Despí dau 1971

NISSA PANTAI, CEN QU’ES?

Es una associacion Lei 1901, creada en lo 1971 e dont lo president fondator siguèt Alan Pelhon. Nissa Pantai amassa toi lu estatjants de Nissa e dau sieu comtat per lo mesme amor dau país e lo mesme desir de l’aparar. Es doncas dubèrta en toti e en toi sensa distincion d’atge, de profession, de religion e d’opinion publica.

TÒCAS E ACCIONS

Coma indicat dins lu sieus estatuts, Nissa Pantai entende “defendre e promòure d’entre la populacion locala la cultura occitana sota toi lu sieus aspèctes, l’usança e l’amor dei dialèctes de la lenga occitana e mai particularament dau nissart e de l’alpenc.”

Per aquò faire, Nissa Pantai organiza li activitats seguenti:

  • Cors d’occitan nissart e alpenc
  • Webràdio emb d’emission e musicas 100% en occitan
  • Animacions (Dictada Occitana, Vocàlia dals Palhons, Sansonhada, vísitas guidadi…)
  • Atalhiers (carneval, coïna, cant, dança, teatre)
  • Edicion (Calendari Nissart, juecs, glossaris e libres en occitan nissart e alpenc…)
  • Venda de produchs culturals

E ENCARA?

La cultura es finda l’uman, lo biais de viure d’un pòble, li sieus tradicions e costumas, lu rapòrts umans, una mentalitat, un biais de pensada, una arquitectura, …

VOLÈM VIURE E TRABALHAR AU PAÍS EN PARLANT LA LENGA NÒSTRA!

Parlar la lenga nòstra es un drech tant important coma aqueu de viure dignament au país dont siam nascuts ò installats, sensa aver da besonh de partir cercar fortuna dins lo nòrd de França.

L’associacion Nissa Pantai assumisse una posicion ambicioa pertocant la lenga nòstra. L’occitan nissart e alpenc es un instrument de comunicacion modèrne que non a doncas vocacion a si limitar ai domenis dau folclòre e de la tradicion. Es tanben l’afirmacion d’una identitat culturala fòrta. L’emparar, es la si tornar apropriar e ensin s’afranquir de la “vergonha” transmesa ai nòstres ancians per l’escòla de la Republica jacobina. Es tanben un acte militant en favor de la lenga, la cultura, l’art de viure, li campanhas e lo teissut economic e social dau País Nissart e Alpenc, part integranta de l’Occitània granda.