Nissa Pantai – Istoric

1971-1997 Naissença, desvolopament e crisis

1r de julhet 1971 – Creacion dau Centre Cultural Occitan (CCÒC) País Nissart

Lo 1r de julhet es creada a Nissa l’associacion Centre Cultural Occitan País Nissart. Lu sieus 7 membres fondadors son Alan PELHON († 1994), Bernard FRUCHIER, Felip POLHON, Joan CORDIER, Joan-Luc SAUVAIGO, Joan-Pèire GIRAUD († 2014) e Maurís SGARAVIZZI († 2011)

Alan Pelhon, Maurís Sgaravizzi e Joan-Luc Sauvaigo, tres dei fondadors dau Centre Cultural Occitan (CCÒC) País Nissart.
Estiu 1971 – Publicacion dau 1r numèro de la revista “La Beluga”

Lo CCÒC País Nissart lança la publicacion de la sieu revista La Beluga dont lo nom es inspirat d’aqueu de l’anciana revista satirica russa Iskra (beluga en rus).

La Beluga es una revista papier que tracta a l’encòup de subjèctes culturals e politics e ben segur de l’actualitat de l’associacion. Toi lu sòcis li son automaticament abonats. Dau 1971 au 2002, lo CCÒC País Nissart ne’n publiquerà 16 numèros.

Setembre 1971 – Dubertura dei promiers cors d’occitan nissart

Lu cors si fan d’en promier a la Maion dei Joves e de la Cultura (MJC) situada en lo quartier de Gorbella, pi a la Cambra dei Mestiers dei Aups-Maritimi, baloard Carabacèl, dins una sala prestada da Joan-Pèire GIRAUD.

Lu cors si debanan cada dimars, au principi a rason d’un cors per setmana pi a la fin, tres cors de diferents nivèus, donats per Bernard FRUCHIER, Joan-Marc PATRITI e Pèire MACARI.

Aquelu cors dureràn fins au 1981 e auràn amassat mai de 200 escolans.

Bernard Fruchier e Pèire Macari au cors d’occitan nissart a la Cambra dei Mestiers dei Aups-Maritimi.
Estiu 1972 – Promiera crisi màger: la scission

Lo CCÒC País Nissart patisse una scission entre lo corrent culturalista menat per Alan PELHON e Joan-Luc SAUVAIGO, e lo corrent nacionalista menat per Bernard FRUCHIER e Joan-Pèire GIRAUD

Alan PELHON e Joan-Luc SAUVAIGO quitan lo CCÒC País Nissart per fondar lo “Comitat Niçart d’Estudis Occitans” (CNEO).

Bernard FRUCHIER deven lo 2d president dau CCÒC País Nissart, e Pèire MACARI lo vicepresident.

Bernard FRUCHIER, lo 2d president dau CCÒC País Nissart.
Pèire MACARI, vicepresident dau CCÒC País Nissart.
Setembre 1972 – Cambiament de local

En seguida de la scission, lo CCÒC País Nissart deu quitar lo local dau Cors Salèia, prestat per un amic d’Alan PELHON, e muda lo sieu sèti social a l’Avenguda dau Rai, pi en Vila Vielha a Carriera Benèst Bunico.

Lo local dau CCÒC País Nissart en Carriera Bunico mentre d’una amassada generala.
Lo mesme local vist per carriera.
1975-1981 – Lo CCÒC País Nissart si desvolopa

Lo CCÒC País Nissart viu un periòde de dinamisme mentre dau quau desvolopa li sieus activitats de difusion de la lenga:

  • Cors d’occitan nissart que rassemblan au total mai de 200 escolans
  • Publicacions de La Beluga e finda de mantu autres libres e librions divèrs
  • Participacions a d’eveniments culturals dont lu Festenaus dau Libre
  • Organizacion de colonias de vacanças.
Banc dau CCOC País Nissart au Festenau dau Libre, emb la visita de personalitats illustri dont lo famós pensaire occitan Francés FONTAN.
1981-1997 – Segonda crisi màger: l’intrada en ibernacion

Lo CCÒC País Nissart escapa pas a la crisi prefonda que travèrsa l’occitanisme au començament dei ans 1980 (divisions, envielhiment de la basa militanta, replecs localistas e revendicacions minimalisti).

Lèu, la partença d’un molon de sòcis per lo movement socialista e autonomista Volem Viure Al País priva l’associacion d’un secretari e d’un clavaire.

L’acumulacion de divèrs problèmas e la mudacion dau president Bernard FRUCHIER a Luceram per de rasons familiali mènan a l’abandon dau CCÒC País Nissart. L’associacion pèrde lo sieu local e ientra dins un lòng periòde d’inactivitat.

1997-Aüra… Renaissença e evolucions

14 de febrier 1997 – Renaissença e evolucion dau CCÒC País Nissart

Après 16 annadas de sòm forçat, lo CCÒC País Nissart renaisse e deven CCÒC País Nissart e Alpenc.

L’associacion adòpta un novèu lògo. Cristòu DAURORE deven lo 3ç president de l’associacion e l’artisan de la sieu reactivacion.

Novèu lògo dau CCÒC País Nissart e Alpenc, creat en lo 1997 e que marca la renaissença e l’evolucion de l’associacion.
Cristòu Daurore, lo 3ç president dau CCÒC País Nissart devengut dementre “CCÒC País Nissart e Alpenc”.
Mai 1998 – Lançament de la 1a Fèsta d’Occitània

Lo CCÒC País Nissart e Alpenc lança la 1a Fèsta d’Occitània a Nissa, en Vila Vielha, sota l’impulsion de l’artista Maurís SGARAVIZZI qu’es lo promier de creire an aquesta fèsta e que n’animerà li dètz promieri edicions.

Aquesta fèsta a per tòca de far descurbir la riquessa culturala de l’espaci occitan e de far capir que lu nòstres dialèctes nissart e vivaroalpenc fan part de l’occitan, una granda comunautat lingüistica de mai de tres milions de locutors e que s’espandisse de Mentan a Bordèu.

Despí, l’eveniment si debana cada an au Teatre Francís Gag e prepaua d’espectacles divèrs e variats de teatre, de cant, de dança, de musica e de poësia.

Febrier 1999 – Lançament dau 1r atalhier de Carneval

Lo CCÒC País Nissart e Alpenc lança lo sieu promier atalhiers de construccion de carres de Carneval que li permete de participar au Carneval oficial de Nissa ensin qu’ai Carnevals dei quartiers.

1r de setembre 2001 – Dubertura de l’atalhier de teatre e creacion de La Chorma

Lo CCÒC País Nissart e Alpenc lança l’activitat de teatre en nissart e crea “La Chorma”. En lo 2016, la tropa pilherà lo nom de « La Chorma Nissa Pantai ».

Pèça “Es Normal” de Raol Nathiez.
Pèça “La Tina” de Gustau Adòlf Mossa.
Aost 2007 – Cambiament de presidéncia

Le CCÒC País Nissart e Alpenc càmbia de direccion. Laurenç REVÈST deven lo novèu president, succedissent a Cristòu DAURORE que deven director denant de repilhar la presidéncia en lo 2013.

Laurenç REVÈST, president dau 2007 au 2012
5 d’octòbre 2008 – Creacion e inauguracion de Ràdio Nissa Pantai

La nòva ràdio “Nissa Pantai” es inaugurada a l’occasion de l’11a Fèsta d’Occitània au Teatre Francís Gag. Lo sieu lògo es dessenhat da l’artista Ben. Reinat ANFOSSO dich “La Sciença” prèsta la sieu votz per lo generic principal.

L’idèa de crear una ràdio 100% en occitan naisse en seguida d’estatisticas, realizadi entre lo 2002 e lo 2006, que mòstran que de tota la region PACA, lo departament dei Aups-Maritimi a la melhora mantenença de la lenga occitana tant en mitan urban coma en mitan rural. Ensin, sus d’un panèl de 200 personas dins li 163 comunas dau departament, li a un minim de 5% de locutors actius, que pòu anar fins au 60%. De mai, si tròba una ret associativa densa e activa que pòu servir de sorgent.

Fòrt d’aqueli estatísticas e dau constat que lo terren li es pròpi favorable (mai d’un milion d’auditors potencials de Mentan a Tèula e de Nissa a Sant Estève d’en Tiniá), lo CCÒC País Nissart e Alpenc desvolopa lo projècte de webràdio en lenga occitana. L’idèa es de donar ai auditors l’accès a una ràdio en occitan dins la 3a ciutat d’Occitània e la 5a ciutat de França en nombre d’estatjants, dins una zòna de renomenada internacionala (“Costiera d’Azur”), au mitan dei ràdios francofòni e d’un desenau de ràdios anglofòni, italianofòni, russofòni ò mai ebreofòni.

Ràdio Nissa Pantai es una webràdio associativa que difusa 24h/24 e 7j/7 d’emissions e de músicas en occitan nissart e alpenc.

1r lògo de Ràdio Nissa Pantai, dessenhat da l’artista Ben. Lo lògo serà modificat en lo 2013.
Entrevista dau cantador Nadau per la chorma de Ràdio Nissa Pantai
17 de decembre 2012 – Cambiament de lògos

Lo CCÒC País Nissart e Alpenc e Ràdio Nissa Pantai adòptan de novèus lògos mai modèrnes.

29 de setembre 2013 – Lançament de l’emission FotPantai e 1a difusion en dirècte

A l’ocasion dau rescòntre Nissa-Valenciennes (4-1) que inaugura lo novèl Estadi de Nissa Sant Isidòr, Ràdio Nissa Pantai retransmete per lo promier còup en dirècte un rescòntre de fotbòl de l’OGC Nissa, en l’encastre de la sieu emission esportiva “FotPantai” creada a la prima dau 2012.

A comptar d’aquí, Ràdio Nissa Pantai si fa una notorietat en difusant en dirècte e en occitan nissart toi lu rescòntres a maion de l’OGC Nissa e mai de rescòntres a Mónegue. Fins aquí, lu rescòntres dau Gim èran comentats dins li tribunas de l’Estadi dau Rai e difusats a la ràdio en diferat.

Ciril JOANIN e Cristòu DAURORE au 1r rescòntre en dirècte a l’Estadi de Sant Isidòr.
Aficha de l’emission FotPantai.

11 de març 2016 – Lo CCÒC País Nissart e Alpenc deven Nissa Pantai

L’associacion Centre Cultural Occitan – País Nissart e Alpenc deven Nissa Pantai – Centre Cultural Occitan País Nissart e Alpenc (reduch en Nissa Pantai, mai facil de retenir). Lo lògo càmbia per la mesma ocasion.

7 d’octòbre 2018 – Ràdio Nissa Pantai festèja lu sieus 10 ans d’existéncia!

La 21a Fèsta d’Occitània, organizada lo 7 d’octòbre dau 2018, marca lo 10n anniversari de la ràdio que, la mesma annada, benifícia d’un desvolopament dei sieus mejans materials: novèu logicial de difusion, sit modèrne e aplicacion per esmartfòns.

Setembre-Octòbre 2019 – Lançament dau 1r Vocàlia dals Palhons, festenau occitan de cant tradicional
1r de julhet 2021 – Nissa Pantai CCOC País Nissart e Alpenc festèja lu sieus 50 ans d’existéncia