Ràdio Nissa Pantai – Emissions

Li emissions de

Ràdio Nissa Pantai

Cronicas

As ben parlat mai de qu’as dich?

Oraris de difusion:

  • diluns a 14h00
  • dimars a 09h00
  • dimècres a 18h00
  • dijòus a 14h00
  • divendres a 09h00
  • dissabta a 18h00

Emission en occitan provençau, realizada per Bernat VATON e l’associacion Ben Lèu, e difusada sus Ràdio Mix, una ràdio d’Aurenja. Son mes a l’onor lei liceans que s’exprimisson en provençau sus de subjèctes d’actualitat de tota mena.

Lo Jornalet

Oraris de difusion:

Cada jorn a

  • 00h00
  • 04h00
  • 08h00
  • 12h00
  • 16h00
  • 20h00

Cronica setmaniera d’actualitats, nomenada Lo Jornalet en referéncia a Jornalet, la gaseta occitana d’informacion gerida per l’Associacion entara Difusion d’Occitània en Catalonha (ADÒC). La cronica dona cada setmana li informacions mai recenti extrachs dei articles dau jornal occitan d’actualitats en linha.

FotPantai

Oraris de difusion:

Cada jorn a

  • 00h30
  • 04h30
  • 08h30
  • 12h30
  • 16h30
  • 20h30

En dirècte lu jorns de rescòntres de l’OGC Nissa a domicili

FotPantai es l’emission esportiva de Ràdio Nissa Pantai. Fa lo compendi complet dei rescòntres de l’OGC Nissa de la setmana precedenta, tant en Liga 1 coma en copas d’Euròpa. 

Es tanben en l’encastre de FotPantai que Ràdio Nissa Pantai comenta en dirècte e en nissart toi lu rescòntres de l’OGC Nissa a domicili e a Mónegue. Es gràcias an aquò que Ràdio Nissa Pantai es venguda un simbòl celèbre de la nissartitud dins lo mitan dau fotbòl e s’es raprochada de l’OGC Nissa.

Li minutas nissardi de Francés Gag

Oraris de difusion:

Cada jorn a

  • 09h35
  • 16h50
  • 18h35

Li minutas nissardi de Francís Gag èra una cronica quotidiana en nissart difusada dau 1973 au 1976 sus Ràdio França Costiera d’Azur. Tractava indistintament de questions d’actualitat e de societat, d’anecdòtas, de sovenirs, de tradicions e de l’etnografia de la nòstra region. Li retrobam lu grands tèmas que travèrsan l’òbra de Gag: lo vilatge imaginari de Ribassiera e tot lo pòble de la montanha nissarda, ò la cobla mitica Tanta Victorina-Titon!

Aqueli cronicas revèlan da Gag lo doble cruci de parlar una lenga de qualitat tot en respectar l’espontaneïtat de l’expression populara. Es en efiech lo paradòxo de la cronica ràdio que de fintar l’improvisacion, quora es la frucha d’un autentic trabalh d’escritura.

L’art dau contaire e la construccion dei racòntes denòtan una lenga fòrça elaborada. La preocupacion pedagogica de l’autor apareisse clarament dins lo sieu biais d’introdurre au fiu dei sieus prepaus quaucu mots rars ò oblidats, que dobla de còups d’un sinonim mai corrent, e mai d’un afrós gallicisme, per assegurar la compreneson!

Consideradi coma irremediablament perdudi, li bandas magnetiqui dei “Minutas” son estadi retrobadi per la Federacion dei Associacions dau Comtat de Nissa. Après aver numerizat aqueu tresaur lingüistic, la Federacion a confidat a Pèire-Loís Gag e Miqueu Pallanca la realizacion d’aquest obratge publicat a l’ocasion dau vinten anniversari de la desaparicion de Francís Gag.

Ràdio Nissa Pantai redifusa Li minutas nissardi de Francís Gag emb l’aimabla autorizacion dau sieu fiu Pèire-Loís Gagliolo.

Nissa la poética

Oraris de difusion:

Cada jorn a

  • 09h30
  • 16h45
  • 18h30

Minuta poetica de Ràdio Nissa Pantai, cada jorn, entre doi emissions ò doi pàginas musicali, Nissa la poética vos fa descurbir la poesia occitana a travèrs la lectura de tèxts d’autors nissarts, alpencs e mai d’Occitània tota. Nissa es pas solament una vila, es finda un poèma!

L’occitan del jorn

Oraris de difusion:

Cada jorn a

  • 09h40
  • 16h55
  • 18h40

Cronica de Clamenç Pech presentant cada setmana un personatge istoric d’Occitània tota. Extracha de Ràdio Occitània, aquesta cronica es redifusada per Ràdio Nissa Pantai dins l’encastre dau partenariat que liga li doi ràdios.


Entrevistas

Li belugas de Cristòu

Oraris de difusion:

  • diluns a 18h00
  • dimars a 14h00
  • dimècres a 09h00
  • dijòus a 18h00
  • divendres a 14h00
  • dissabta a 09h00

Dont que sigue, dont que vague, Cristòu DAURORE si passèja dapertot emb lo sieu microfòn per capturar toi lu eveniments que si debanan a Nissa e entrevistar de personalitats divèrsi que rescòntra en camin. De personalitats dau mitan cultural, literari, lingüistic, politic e autre de Nissa, de Gavotina e d’Occitània tota!

“Cristòu, li sauta de belugas quora se’n va ‘mé lo micro!”

Corona de sera

Oraris de difusion:

Cada jorn a 19h00

Corona de sera èra una emission setmaniera d’una ora mentre de la quala èran entrevistadi en dirècte, dau temps de la crisi sanitària de la Covid19, diferenti personalitats dau mitan occitan, tant cultural coma politic. Si tractava de toi lu subjèctes segon lo domeni d’activitat de la persona convidada. Ràdio Nissa Pantai ne’n redifusa en diferat toti li edicions.

Corona de sera s’es creada lo 27 de març dau 2020 au principi dau promier confinament consecutiu a la crisi sanitària ligada a la pandèmia de Covid 19. Lo nom de l’emission fa ben segur allusion au coronavirus mas finda a la corona que figura sus l’emblèma dau Comtat de Nissa. Fa tanben allusion au provèrbi nissart “roge de sera, bèu temps espèra”. Un biais d’esperar de temps melhors après la pandèmia.

Vision dal mond (Gavotina Pantais)

Oraris de difusion:

  • diluns a 09h00
  • dimars a 18h00
  • dimècres a 14h00
  • dijòus a 09h00
  • divendres a 18h00
  • dissabta a 14h00

D’ont que siguessiatz, d’Occitània tota ò de las Alps Maritimas, avètz ja sentit parlar de Niça, de la Contea de Niça, dal niçard. Sabètz qu’existe tanben Provença e lo provençal, gràcias al Prèmi Nobel 1904, Frederic Mistral. E avètz ja ausit parlar de Lengadòc, d’Auvèrnha, ect.

Mas conoishètz Mentan, Dinha, Gap, lo Comtat de Buelh, l’Estat d’e Vile Líbere de Mentan e Recabruna? E mai conoishètz l’autre grand dialècte de la region, parlat d’Esa e Mentan fins a Briançon en passar per Puget-Teniers ò Sisteron? Es lo vivaroalpin ò gavòt.

Vision dal mond es una emission “made in Gavotina”, liura, d’actualitat e a tèmas sus la vision qu’avèm d’Occitània e dal mond entier. Son animator Laurenç REVÈST i entrevista diferentas personalitats dal mitan occitan.


Espectacles

Un pantais de concèrts

Oraris de difusion:

  • dimars a 10h00
  • dijòus a 15h00

Ràdio Nissa Pantai acòrda una granda importància a la creacion musicala d’expression occitana. Ensin, gràcias a l’emission Un pantais de concèrts, son redifusats en integralitat lu concèrts que si debanan a Nissa, dins la sieu region e mai en Occitània tota.

Per aquò faire, Ràdio Nissa Pantai non manca minga concèrt dei grops occitans que si produson dins la region e mai en defòra, especialament a l’Uvernada (la Fèsta de Lo Dalfin dins li Valadas), a l’Estivada de Rodés, au Festi’ Cant, a la Fèsta d’Occitània e a ben d’autri ocasions. Rock, Fòlc, raggà, trad e patin cofin, toi lu estils son representats!

Teatralament Nissa

Oraris de difusion:

  • diluns a 15h00
  • divendres a 10h00

Teatralament Nissa es una emission literària que redifusa en integralitat toti li pèças de teatre jugadi en nissart per li chormas de teatre mai famoï de Nissa (Francís Gag, lo Ròdol Nissart, lu Bastian-Contraris, lu Tridentins, la Chorma Nissa Pantai…) emb una granda diversitat d’autors tant ancians coma actuals (Rancher, Mossa, Gag, Sauvaigo, Toscano…).


Reportatges

La coïna en pantais

Oraris de difusion:

Cada jorn a 11h00

La coïna en pantais, l’emission que vos fa descurbir la coïna nissarda a travèrs divèrs reportatges registrats a l’ocasion de diferents eveniments culinaris, especialament lu atalhiers de coïna animats per l’associacion Nissa Pantai.

La vida en la Contea

Oraris de difusion:

  • diluns a 10h00
  • divendres a 15h00

La vida en la Contea es una emission sus la vida culturala a Nissa e en la Contea. Son immortalizats toi lu eveniments culturals mai emblematics qu’animan lo nòstre país (conferéncias, festins, ..

Li vísitas guidadi de Nissa en nissart

Oraris de difusion:

  • dimars a 15:00
  • dijòus a 10:00

Despí de julhet dau 2005, Cristòu DAURORE organiza dins l’encastre de Nissa Pantai li vísitas guidadi de Nissa en nissart. Aüra n’a fach mai d’un centenau! 

Aqueli vísitas guidadi son registradi e redifusadi sus Ràdio Nissa Pantai gràcias a l’emission Li vísitas guidadi de Nissa en nissart. Una emission que vos fa viatjar dins lo temps e descurbir l’istòria e lo patrimòni dei quartiers mai emblematics de Nissa: lo Babasoc, lo Pòrt, lo Castèu, la plaça Garibaldi, Cimier, l’Abadia de Sant-Pòns…