Ràdio Nissa Pantai

Ràdio Nissa Pantai, te’n dona sempre de mai!*

* (Radio Nissa Pantai, elle t’en donne toujours plus!)

Es sota d’aquel eslogan que vira sus Internet, despí dau 2008, la ràdio associativa Ràdio Nissa Pantai, una webràdio que difusa 24h/24 e 7j/7 de música e d’emissions 100% en occitan nissart e alpenc.

A partir dau constat que lo departament dei Aups-Maritimi avia la melhora mantenença de la lenga occitana en mitan tant urban coma rural e que l’occitan èra a maugrat tot esquasi completament absent dins lu mèdias radiofonics locals, s’impauèt l’idèa de crear una ràdio en occitan dins la 3a ciutat d’Occitània e la 5a ciutat de França en nombre d’estatjants.

Despí, la ràdio s’es desvolopada dins lo foncionament e la durada, contribuissent a la renomenada de l’associacion, tant dins lo mitan nissart e alpenc e mai d’Occitània tota. 

En lo 2018, Ràdio Nissa Pantai festegèt lu sieus 10 ans d’existéncia!

Aüra, Ràdio Nissa Pantai prepaua una programacion rica e diversificada. Son difusadi tota mena d’emissions (cronicas, reportatges, entrevistas…) sus dei subjèctes mai divèrs (culturals, istorics, politics…) acompanhadi de cançons d’un molon de grops occitans de tot estil mesclat.

Li doi emissions mai celèbri de Ràdio Nissa Pantai son:

  • FotPantai: una emission esportiva dins la quala si comentan en dirècte e en nissart de toi lu rescòntres de fotbòl de l’OGC Nissa a maion.
  • Corona de sera: una emission creada en lo 2020 en plena pandèmia de CoVid-19 e dins la quala son entrevistadi cada setmana en dirècte una personalitat dau mond cultural ò politic occitan. Aquesta emission a conoissut un succès grandàs.

Ràdio Nissa Pantai entreten de partenariats emb Ràdio Lenga d’Òc, Ràdio Occitània e Nissa Actu.

RÀDIO NISSA PANTAI, per que lo pantais vengue realitat!