Nissa Pantai planhe lo duelh despí li mòrts successivi de Crestian Bezet, lo 5 de mai dau 2024, pi de l’artista Ben Vautier e la sieu esposa Annia, tot bèu just un mes plus tardi, lo 5 de junh.
Crestian Bezet, Ben e Annia Vautier èran de sostens emblematics de Nissa Pantai, qu’ajudavan totplen.
Crestian Bezet èra un autor prolific de cançons en occitan nissart embai grops famós Lo Mago d’en Castèu pi Amploa dont Nissa Pantai vende lu CD. Èra tanben lo pairin dau festenau Vocàlia dals Palhons, lançat per Nissa Pantai en lo 2019.
Ben Vautier èra un artista celèbre. Mondialament conegut per la sieu escritura pintada de blanc sus un fond negre, èra tanben notàriament estacat a la causa occitana. Amic de Francés Fontan, un dei pensaires màgers de l’occitanisme dei ans 1960-70, Ben Vautier sostenia l’occitanisme a Nissa, e pus particularament lo Centre Cultural Occitan País Nissart e Alpenc.
Donèt la sieu escritura au lògo de Ràdio Nissa Pantai dont eu e la sieu frema èran lo pairin e la mairina. Ben Vautier donèt tanben la sieu escritura per:
- Lo lògo dau festenau Vocàlia dals Palhons
- La cubèrta dei darrieri publicacions “L’abecedari Occitan” e “Nissa Pantai”
- Li illustracions de mantu modèls de malhetas
En lo 2018, ajudèt tanben Nissa Pantai en li metent a disposicion lo local qu’avia en Vila Vielha. Pi un pauc mai de doi mes fa, nos aculhèt au sieu per organizar la remesa dei diplòmas ai participants de la 22a Dictada Occitana.
Nissa Pantai entretenia emb Ben Vautier un ligam afectiu e cultural fòrt que ne’n faïa la sieu particularitat.
Ben decidèt de n’acabar emb la vida, lo dimècres 5 de junh au matin, tot bèu just après que decede la sieu esposa Annia emb la quala èran indesseparables.
Es una pèrda enòrma per Nissa Pantai, per Nissa, per Occitània tota, per la cultura, per l’occitanisme cultural e politic e d’en promier ben segur per la sieu familha.
Adreiçam toti li nòstri condolenças ai pròches de Ben e Annia Vautier, especialament lu sieus enfants.