Lo diménegue 28 de genoier a 15 oras si debanerà sus la Plaça Sant Ròc lo 35n Campionat dau Mond de Mandar de Palhasso. Es lo 1r eveniment carnevalèsc de Nissa dau 2024.
Nissa Pantai vos dona apontament sus de la plaça de la glèia de Sant Ròc per vos marcar au campionat e formar de chormas de doi jugaires. La tècola dau juec es de mandar en longuesa, emb l’ajuda d’un lançòu, lo Palhasso, un òme de palha nissart, lo mai luenh possible.
Aquesta manifestacion esportiva es a gratis. Li chormas son formadi de doi personas e representan caduna un país existent ò imaginari. Existon 4 categorias d’atges :
- Categoria 1 Nenons (0 a 5 ans),
- Categoria 2 Pichoi (6 a 11 ans),
- Categoria 3 Adòs (12 a 17 ans),
- Categoria 4 Madurs (18 ans e mai).
Lo Campionat dau Mond de Mandar de Palhasso es una vièlha tradicion de l’An Nòu. Lo Palhasso es una mariòta qu’incarna toi lu crucis amolonats de l’an passat. Lo mandar lo mai luenh possible constituisse un biais de si desbarrassar d’aquelu moments dificils passats e començar la novèla annada emb l’esperit laugier.
Aquesta manifestacion es ligada despí de la sieu creacion au Carneval Independent de Sant Ròc. Lo recòrdi dau mond (15,30 metres de longuesa) es detengut, despí dau 2007, da la chorma de la Contea de Nissa “Lu poetas”, rapresentada da Joan PICCINELLI e Romieu MARTIN. Lu recòrdis dau mond per l’ensems dei categorias son:
- 15,30 metres (equipa de Nissa, 2007) per la categoria 4 (madurs),
- 9,20 mètres (equipa du Wakanda, 2020) per la categoria 3 (adòs),
- 5,90 mètres (equipa d’Itàlia, 2016) per la categoria 2 (pichoi),
- 1,50 mètres (equipa de Mars, 2009) per la categoria 1 (nenons),
Per mai d’informacions, podètz contactar dirèctament Nissa Pantai:
- Per telefòn au 06 71 18 61 21
- Per corrièl a info@nissapantai.org
Vos convidam d’escotar Ràdio Nissa Pantai sus Internet e mai sus Androïd gràcias a l’aplicacion per esmartfòns.