1971-1997 Naissença, desvolopament e crisis
1r de julhet 1971 – Creacion dau Centre Cultural Occitan (CCÒC) País Nissart
Lo 1r de julhet es creada a Nissa l’associacion Centre Cultural Occitan País Nissart. Lu sieus 7 membres fondadors son Alan PELHON († 1994), Bernard FRUCHIER, Felip POLHON, Joan CORDIER, Joan-Luc SAUVAIGO, Joan-Pèire GIRAUD († 2014) e Maurís SGARAVIZZI († 2011)
Alan Pelhon, Maurís Sgaravizzi e Joan-Luc Sauvaigo, tres dei fondadors dau Centre Cultural Occitan (CCÒC) País Nissart.
Estiu 1971 – Publicacion dau 1r numèro de la revista “La Beluga”
Lo CCÒC País Nissart lança la publicacion de la sieu revista La Beluga dont lo nom es inspirat d’aqueu de l’anciana revista satirica russa Iskra (beluga en rus).
La Beluga es una revista papier que tracta a l’encòup de subjèctes culturals e politics e ben segur de l’actualitat de l’associacion. Toi lu sòcis li son automaticament abonats. Dau 1971 au 2002, lo CCÒC País Nissart ne’n publiquerà 16 numèros.
Setembre 1971 – Dubertura dei promiers cors d’occitan nissart
Lu cors si fan d’en promier a la Maion dei Joves e de la Cultura (MJC) situada en lo quartier de Gorbella, pi a la Cambra dei Mestiers dei Aups-Maritimi, baloard Carabacèl, dins una sala prestada da Joan-Pèire GIRAUD.
Lu cors si debanan cada dimars, au principi a rason d’un cors per setmana pi a la fin, tres cors de diferents nivèus, donats per Bernard FRUCHIER, Joan-Marc PATRITI e Pèire MACARI.
Aquelu cors dureràn fins au 1981 e auràn amassat mai de 200 escolans.
Bernard Fruchier e Pèire Macari au cors d’occitan nissart a la Cambra dei Mestiers dei Aups-Maritimi.
Estiu 1972 – Promiera crisi màger: la scission
Lo CCÒC País Nissart patisse una scission entre lo corrent culturalista menat per Alan PELHON e Joan-Luc SAUVAIGO, e lo corrent nacionalista menat per Bernard FRUCHIER e Joan-Pèire GIRAUD.
Alan PELHON e Joan-Luc SAUVAIGO quitan lo CCÒC País Nissart per fondar lo “Comitat Niçart d’Estudis Occitans” (CNEO).
Bernard FRUCHIER deven lo 2d president dau CCÒC País Nissart, e Pèire MACARI lo vicepresident.
Bernard FRUCHIER, lo 2d president dau CCÒC País Nissart.
Pèire MACARI, vicepresident dau CCÒC País Nissart.
Setembre 1972 – Cambiament de local
En seguida de la scission, lo CCÒC País Nissart deu quitar lo local dau Cors Salèia, prestat per un amic d’Alan PELHON, e muda lo sieu sèti social a l’Avenguda dau Rai, pi en Vila Vielha a Carriera Benèst Bunico.
Lo local dau CCÒC País Nissart en Carriera Bunico mentre d’una amassada generala.
Lo mesme local vist per carriera.
1975-1981 – Lo CCÒC País Nissart si desvolopa
Lo CCÒC País Nissart viu un periòde de dinamisme mentre dau quau desvolopa li sieus activitats de difusion de la lenga:
- Cors d’occitan nissart que rassemblan au total mai de 200 escolans
- Publicacions de La Beluga e finda de mantu autres libres e librions divèrs
- Participacions a d’eveniments culturals dont lu Festenaus dau Libre
- Organizacion de colonias de vacanças.
Banc dau CCOC País Nissart au Festenau dau Libre, emb la visita de personalitats illustri dont lo famós pensaire occitan Francés FONTAN.
1981-1997 – Segonda crisi màger: l’intrada en ibernacion
Lo CCÒC País Nissart escapa pas a la crisi prefonda que travèrsa l’occitanisme au començament dei ans 1980 (divisions, envielhiment de la basa militanta, replecs localistas e revendicacions minimalisti).
Lèu, la partença d’un molon de sòcis per lo movement socialista e autonomista Volem Viure Al País priva l’associacion d’un secretari e d’un clavaire.
L’acumulacion de divèrs problèmas e la mudacion dau president Bernard FRUCHIER a Luceram per de rasons familiali mènan a l’abandon dau CCÒC País Nissart. L’associacion pèrde lo sieu local e ientra dins un lòng periòde d’inactivitat.
1997-Aüra… Renaissença e evolucions
14 de febrier 1997 – Renaissença e evolucion dau CCÒC País Nissart
Après 16 annadas de sòm forçat, lo CCÒC País Nissart renaisse e deven CCÒC País Nissart e Alpenc.
L’associacion adòpta un novèu lògo. Cristòu DAURORE deven lo 3ç president de l’associacion e l’artisan de la sieu reactivacion.
Novèu lògo dau CCÒC País Nissart e Alpenc, creat en lo 1997 e que marca la renaissença e l’evolucion de l’associacion.
Cristòu Daurore, lo 3ç president dau CCÒC País Nissart devengut dementre “CCÒC País Nissart e Alpenc”.
Genoier 1998 – Campionat dau mond de Mandar de Palhasso
Creat en lo 1990 per lu fondators dau Carneval Independent de Sant Ròc, lo Campionat dau Mond de Mandar de Palhasso es un moment de passatge obligatòri de la cultura nissarda e dau Carneval de Nissa.
Lo Palhasso es un personatge d’estraça qu’incarna toi lu crucis de l’an passat. Lo juec consistisse a la mandar lo mai luenh possible. Es un biais de si desbarrassar de toi lu crucis de l’annada escolada.
L’eveniment si debana cada an a la fin de genoier sus la Plaça Sant Ròc. Es a gratis e dubèrt a toi lu atges e toi lu país (tant reals coma imaginaris) li pòdon èstre representats.
Lo Campionat dau Mond de Mandar de Palhasso fa la jòia tant dei pichoi coma dei joves, actius ò retirats dau quartier de Sant Ròc e mai dei quartiers a l’entorn (Ariana e Bòn Viatge).
Vist la diversitat dei atges e dei originas etniqui e sociali dei participants, aquesto campionat constituisse un oportunitat extraordinària de favorizar lu escambis. Contribuisse ensin a la coesion sociala d’aquelu quartiers.
Printemps 1998 – Lançament de la 1a Dictada Occitana a Nissa
Nissa Pantai organiza cada an la Dictada Occitana en nissart e en alpenc.
A l’origina, aquesta manifestacion siguèt creada a Castras en lo 1998 per lo Centre Occitan del País Castrés pi lèu lèu s’espandiguèt dins un quarantenau de comunas d’Occitània tota. Es en lo 2003 que la Dictada Occitana siguèt organizada per lo promier còup a Nissa per lo Centre Cultural Occitan País Nissart e Alpenc a la demanda dau Centre Occitan del País Castrés.
Aüra, Nissa Pantai organiza tanben la Dictada Occitana en lo País Alpenc e mai dins lo quadre escolar mentre dei cors d’occitan nissart e alpenc dins divèrs establiments.
Aquest eveniment a per tòca de tornar donar li sieus letras de noblessa a l’escrich en occitan, dins la sieu diversitat dialectala, tant dins lo sieu espaci lingüistic coma a l’estrangier (dins tres vilas de Catalonha).
Cada an si chausisse un tèxt d’un autor local d’expression occitana nissarda ò alpenca. L’eveniment si debana a la fin de dau mes de genoier au Palais dei Reis de Sardenha. Es dubèrt a tot public e s’acaba emb una remèsa de prèmi.
Mai 1998 – Lançament de la 1a Fèsta d’Occitània
Lo CCÒC País Nissart e Alpenc lança la 1a Fèsta d’Occitània a Nissa, en Vila Vielha, sota l’impulsion de l’artista Maurís SGARAVIZZI qu’es lo promier de creire an aquesta fèsta e que n’animerà li dètz promieri edicions.
Aquesta fèsta a per tòca de far descurbir la riquessa culturala de l’espaci occitan e de far capir que lu nòstres dialèctes nissart e vivaroalpenc fan part de l’occitan, una granda comunautat lingüistica de mai de tres milions de locutors e que s’espandisse de Mentan a Bordèu.
Despí, l’eveniment si debana cada an au Teatre Francís Gag e prepaua d’espectacles divèrs e variats de teatre, de cant, de dança, de musica e de poësia.
Febrier 1999 – Lançament dau 1r atalhier de Carneval
Lo CCÒC País Nissart e Alpenc lança lo sieu promier atalhiers de construccion de carres de Carneval que li permete de participar au Carneval oficial de Nissa ensin qu’ai Carnevals dei quartiers.
1r de setembre 2001 – Dubertura de l’atalhier de teatre e creacion de La Chorma
Lo CCÒC País Nissart e Alpenc lança l’activitat de teatre en nissart e crea “La Chorma”. En lo 2016, la tropa pilherà lo nom de « La Chorma Nissa Pantai ».
Despí dau 2001, Nissa Pantai organiza d’atalhiers de teatre en nissart. D’aquelu atalhiers es naissuda la tropa de teatre La Chorma. Devenguda en lo 2016 La Chorma Nissa Pantai, a au sieu actiu un larg repertòri de pèças dont li mai famoï son:
- “Li rementas nucleari” de Bernard Vaton,
- “230 ans de Rancher” de Joan-Marc Eusèbi,
- “Li aventuras de Cogordon” de Joan-Marc Eusèbi,
- “La Tina” de Gustau Adòlf Mossa,
- “Mas que chaple!”.
La Chorma Nissa Pantai es sovent programada dins divèrs eveniments culturals, especialament la Fèsta d’Occitània organizada en l’encastre dau festenau Vocàlia dals Palhons.
Pèça “Es Normal” de Raol Nathiez.
Pèça “La Tina” de Gustau Adòlf Mossa.
2005 – 1a vísita guidada de Nissa en nissart
Despí dau 2005, Nissa Pantai organiza de vísitas guidadi de Nissa en nissart. Lu quartiers visitats son la Vila Vielha (Babazoc), lo Castèu, lo Pòrt, li arènas e lo sit arqueologic de Cimier.
Dau 2005 fins aüra, mai de 1800 personas an participat an aqueli vísitas dont per una màger part de gents de la region qu’an poscut tornar descurbir lo patrimòni de Nissa dins la lenga dau país. Mas li vísitas interèssan de mai en mai de forastiers venent de Catalonha, d’Itàlia e mai dau Japon dont l’occitan es ensenhat.
Li vísitas guidadi si fan de costuma un còup per mes. Li datas son comunicadi dins l’agenda. Son integralament registradi e difusadi sus Ràdio Nissa Pantai.
Laurenç REVÈST, president dau 2007 au 2012
Aost 2007 – Cambiament de presidéncia
Le CCÒC País Nissart e Alpenc càmbia de direccion. Laurenç REVÈST deven lo novèu president, succedissent a Cristòu DAURORE que deven director denant de repilhar la presidéncia en lo 2013.
Laurenç REVÈST, president dau 2007 au 2012
5 d’octòbre 2008 – Creacion e inauguracion de Ràdio Nissa Pantai
La nòva ràdio “Nissa Pantai” es inaugurada a l’occasion de l’11a Fèsta d’Occitània au Teatre Francís Gag. Lo sieu lògo es dessenhat da l’artista Ben. Reinat ANFOSSO dich “La Sciença” prèsta la sieu votz per lo generic principal.
L’idèa de crear una ràdio 100% en occitan naisse en seguida d’estatisticas, realizadi entre lo 2002 e lo 2006, que mòstran que de tota la region PACA, lo departament dei Aups-Maritimi a la melhora mantenença de la lenga occitana tant en mitan urban coma en mitan rural. Ensin, sus d’un panèl de 200 personas dins li 163 comunas dau departament, li a un minim de 5% de locutors actius, que pòu anar fins au 60%. De mai, si tròba una ret associativa densa e activa que pòu servir de sorgent.
Fòrt d’aqueli estatísticas e dau constat que lo terren li es pròpi favorable (mai d’un milion d’auditors potencials de Mentan a Tèula e de Nissa a Sant Estève d’en Tiniá), lo CCÒC País Nissart e Alpenc desvolopa lo projècte de webràdio en lenga occitana. L’idèa es de donar ai auditors l’accès a una ràdio en occitan dins la 3a ciutat d’Occitània e la 5a ciutat de França en nombre d’estatjants, dins una zòna de renomenada internacionala (“Costiera d’Azur”), au mitan dei ràdios francofòni e d’un desenau de ràdios anglofòni, italianofòni, russofòni ò mai ebreofòni.
Ràdio Nissa Pantai es una webràdio associativa que difusa 24h/24 e 7j/7 d’emissions e de músicas en occitan nissart e alpenc.
1r lògo de Ràdio Nissa Pantai, dessenhat da l’artista Ben. Lo lògo serà modificat en lo 2013.
Entrevista dau cantador Nadau per la chorma de Ràdio Nissa Pantai
Printemps 2012 – Lançament dau 1r atalhier de coïna nissarda en nissart
En lo 2012, a l’iniciativa d’una escolana d’un cors de nissart, Nissa Pantai lancèt lo sieu promier atalhier de coïna nissarda en nissart. Siguèt lo principi d’una lònga sèria de mai d’un trentenau d’atalhiers que si perseguisse fins aüra. L’activitat s’es desvolopada e mai fòra de Nissa, en la valada d’en Palhon, en occitan alpenc.
L’objècte d’aquesta activitat es doble: descurbir e emparar la gastronomia nissarda e practicar la lenga dins l’activitat de coïna.
Lu atalhiers de coïna nissarda si debanan en general un còup per mes, la dimenjada e dins diferents luecs. L’eveniment es sempre registrat e difusat sus Ràdio Nissa Pantai.
17 de decembre 2012 – Cambiament de lògos
Lo CCÒC País Nissart e Alpenc e Ràdio Nissa Pantai adòptan de novèus lògos mai modèrnes.
29 de setembre 2013 – Lançament de l’emission FotPantai e 1a difusion en dirècte
A l’ocasion dau rescòntre Nissa-Valenciennes (4-1) que inaugura lo novèl Estadi de Nissa Sant Isidòr, Ràdio Nissa Pantai retransmete per lo promier còup en dirècte un rescòntre de fotbòl de l’OGC Nissa, en l’encastre de la sieu emission esportiva “FotPantai” creada a la prima dau 2012.
A comptar d’aquí, Ràdio Nissa Pantai si fa una notorietat en difusant en dirècte e en occitan nissart toi lu rescòntres a maion de l’OGC Nissa e mai de rescòntres a Mónegue. Fins aquí, lu rescòntres dau Gim èran comentats dins li tribunas de l’Estadi dau Rai e difusats a la ràdio en diferat.
Ciril JOANIN e Cristòu DAURORE au 1r rescòntre en dirècte a l’Estadi de Sant Isidòr.
Aficha de l’emission FotPantai.
11 de març 2016 – Lo CCÒC País Nissart e Alpenc deven Nissa Pantai
L’associacion Centre Cultural Occitan – País Nissart e Alpenc deven Nissa Pantai – Centre Cultural Occitan País Nissart e Alpenc (reduch en Nissa Pantai, mai facil de retenir). Lo lògo càmbia per la mesma ocasion.
7 d’octòbre 2018 – Ràdio Nissa Pantai festèja lu sieus 10 ans d’existéncia!
La 21a Fèsta d’Occitània, organizada lo 7 d’octòbre dau 2018, marca lo 10n anniversari de la ràdio que, la mesma annada, benifícia d’un desvolopament dei sieus mejans materials: novèu logicial de difusion, sit modèrne e aplicacion per esmartfòns.