Data: Dissabta 8 de febrier a 15h00
Luec: Maion Comunala Annèxa a Ròcabruna d’Argens (Plaça dei Felibres)
Programa: Li associacions Nissa Pantai e lo « Comitat d’Estudi Provençau » (CEP) de Ròcabruna d’Argens vos convidan a la presentacion de l’Abecedari Occitan, un recuelh de cronicas en occitan provençau, escrich da Andrieu Abbe, editat e publicat dai edicions Nissa Pantai. Cadun e caduna es la benvenguda per venir discutir dau libre e de l’usatge de l’occitan dins la sieu diversitat per abordar toi lu subjèctes de l’actualitat.
Prètz: Intrada a gratis
Andrieu Abbe, naissut en lo 1944, es un vinhairòu e viatjaire, pi un jornalista occitan provençau de Ròcabruna d’Argenç. Lo sieu Abecedari Occitan es un recuèlh de cronicas qu’escriuguèt dau 1983 au 2023 e que siguèron seleccionadi da Laurenç Revèst que n’es a l’iniciativa.
La sortida d’aquesto libre constituisse un novèl eveniment marcant per l’associacion Nissa Pantai. Coma aquò, après li publicacions de la revista La Beluga dau 1971 au 2002, dau Calendari Nissart despí dau 2005 e la creacion de Ràdio Nissa Pantai en lo 2008, dau libre de Laurenç Revèst Nissa e Occitània per Garibaldi. Anthologie garibadienne d’Oc la mesma annada, l’Abecedari Occitan ven portar una pèira de mai dins lo lòng edifici istoric de l’associacion fondada per li personalitats mai emblematiqui de l’occitanisme nissart dei ans 1970 (Bernard Fruchier, Joan-Pèire Giraud, Alan Pelhon, Joan-Luc Sauvaigo, Maurís Sgaravizzi) e que festegèt lu sieus 50 ans d’existéncia en lo 2021.
L’Abecedari Occitan d’Andrieu Abbe es vendut au benefici de l’escòla Calandreta Maurís Sgaravizzi. En lo crompant, contribuiretz ensin au finançament e a l’avenir de l’ensenhament per immersion de l’occitan dins lo País Nissart.
Per mai d’informacions, podètz contactar dirèctament Nissa Pantai:
- Per telefòn au 06 71 18 61 21
- Per corrièl a info@nissapantai.org