Aqueste dissabta 2 de decembre de 10h00 a 18h00, li Edicions Nissa Pantai presentaràn au Mercat Literari de Calènas L’Abecedari Occitan, lo novèu libre d’Andrieu ABBE que ven d’èstre editat.
Andrieu ABBE es un vinhairon, viatjaire pi jornalista occitan provençau de Ròcabruna d’Argent. L’Abecedari Occitan es un recuelh de cronicas qu’escriuguèt dau 1983 au 2023 e que siguèron seleccionadi da Laurenç REVÈST que n’es a l’iniciativa.
Ensin, cada letra de l’alfabet es illustrada per una cronica e una fòto de l’autor. Es mençonat Joan-Pèire BELMON, lo sieu collèga jornalista occitan provençau a Ràdio França Provença pi a França 3, especialament per l’emission Vaquí.
Lu tres dialèctes de l’Occitània orientala (Region Sud PACA) li son representats: la prefàcia dau libre es en alpenc, lo libre en provençau e la darriera de cubèrta en nissart.
Lo libre es en color e conten 72 pàginas. La cubèrta dau libre siguèt escricha da l’artista Ben VAUTIER.
L’Abecedari Occitan es vendut 15 nissarts (moneda locala) ò 15€. La recèpta de la venda serà au benefici de l’Escòla Calandreta Maurís Sgaravizzi a Nissa.
Per mai d’informacions, podètz contactar dirèctament Nissa Pantai:
- Per telefòn au 06 46 62 74 93 ò 06 71 18 61 21
- Per corrièl a info@nissapantai.org
Vos convidam d’escotar Ràdio Nissa Pantai sus Internet e mai sus Androïd gràcias a la nòstra aplicacion per esmartfòns.