Ràdio Nissa Pantai vos convida a la 28a Fèsta d’Occitània.
Data: Dissabta 20 de setembre a 15h00
Luec: Sala Laure Écard – 50 Baloard Sant Ròc a Nissa
Programa:
- Omenatge ai 100 ans de la Chamada Nissarda
- Sceneta Dix minutes chez le coiffeur e lecturas de tèxts de Joan Nicòla per la tropa de La Chamada Nissarda
- Concèrt de Zine
Prètz: 8 Nissarts ò 10€ (a gratis per lu -18 ans).
Per mai d’informacions, podètz contactar dirèctament Nissa Pantai:
- Per telefòn al 06 46 62 74 93
- Per corrièl a info@nissapantai.org
Presentacion de la Fèsta
La Fèsta d’Occitània es un eveniment annual qu’a per tòca de far remembrar que lu nòstres dialèctes nissart e vivaroalpenc s’inscrivon plan dins la granda comunautat lingüistica occitana, fòrta de mai de tres milions de locutors, e que s’estende de Mentan a Bordèu.
Aquesta fèsta si debana dins lo quadre dau festenau Vocàlia dals Palhons, organizat per Ràdio Nissa Pantai e parrainat per lo defuntat Crestian Bezet. Es ben mai qu’un apontament festiu: es una convidacion a descurbir e celebrar la riquessa culturala de l’espaci occitan, es una declaracion d’amor au nissart, la nòstra lenga, la nòstra identitat, la nòstra fiertat.
Sus scèna, d’artistas d’encuèi pròvan qu’aquesta lenga aparten pas au passat mas au present, e que contunha de crear, d’esmòure e d’inspirar. Bate totjorn fòrt dins lu nòstres còrs e dins li nòstri votz.
L’associacion Nissa Pantai si bate emb gaire de mejans, mas emb una conviccion imbrandabla: l’occitan nissart e alpenc es una lenga viventa, una aisina de comunicacion modèrna e lo rebat de la nòstra identitat, dei nòstri tradicions e dau nòstre biais de viure. L’empara, es si tornar apropriar la nòstra cultura, afortir li nòstri raïç e sostenir lo teissut social e economic dau País Nissart, part integranta d’Occitània.
La vòstra preséncia càmbia tot. En venent an aquesto concèrt, assistètz pas solament a un espectacle: devenètz actor d’aquesta transmission, permetètz de finançar la Ràdio Nissa Pantai, solet mèdia que difusa de nissart de contunh, e afirmatz aut e fòrt que la nòstra cultura s’amerita de viure e de dardalhar.
Presentacion dei artistas
🎭 La Ciamada Nissarda
Fondada en lo 1925 per l’escrivèire e poèta nissart Joan Nicòla, La Ciamada Nissarda es l’un dei grops folclorics mai ancians dau Comtat de Nissa. D’en promier tropa de teatre dialectal, si durbèt lèu a la dança, a la musica e ai recèrcas sus lu costumes e costumas tradicionali.
Encuèi, fòrt d’un centenau de membres, perpetua e difusa lo patrimòni nissart en França e a l’internacional. Reconegut per lo CIOFF (Conseu Internacional dei Festenaus de Folclòre), lo grop aliga fidelitat ai raïç e creativitat, a travèrs de scenetas, concèrts e participacions ai grands festins populars.
En lo 2025, La Ciamada Nissarda celèbra lo sieu centenari, un sègle consagrat a la transmission de la cultura e de l’identitat nissardi.
🎤 Zine
Zine, dau sieu nom vertadier Laurença Penzini, es autora, compositritz, cantadoira màger de la scèna musicala nissarda actuala. Canta principalament en occitan nissart, mas tanben en francés, italian, espanhòu, englés, arabi e polonés. Lo sieu repertòri mescla creacions personali, adaptacions d’estandards internacionals e cançons per enfants.
Poetessa, publiquèt un recuelh (Cantatas d’Azur) e mantu albums, dont Folia doça (2013) e lo recent doble album Cantar la vida cantar l’espèr (2023).
A travèrs la sieu musica, lu sieus atalhiers e lu sieus projèctes pedagogics, Zine defende la vitalitat dei lengas regionali e incarnar una votz modèrna d’Occitània, religant patrimòni e creacion contemporanèa.