Aquest an, l’associacion Nissa Pantai s’es vista refudar l’atribucion d’un banc per lo Festin dei Mais a Cimier (1r, 4, 11, 18 e 25 de mai). Es lo promier còup qu’aquò arriba despí lo 2007 que tenèm lo banc ai Arenas de Cimier. L’informacion nos es parvenguda solament lo diluns 28 d’abriu.
Aquela exclusion injusta nos espanta e suscita l’incompreneson d’entre li mai de 200 sòcias e sòcis que còmpta Nissa Pantai, una associacion culturala qu’òbra despí 54 ans per faire viure la lenga e la cultura dau País Nissart a travèrs de numeroï activitats variadi.
Per remembrança, Nissa Pantai anima la sola ràdio en nissart, dona 6 cors de nissart a Nissa e un cors de vivaroalpenc a Coarasa, fa un trabalh d’edicion e mena manti autri activitats (chorma de teatre, visitas guidadi en nissart, atalhier de coïna, cant, musica, dança, Carneval, iniciacion au Pilo e au Palhasso, balètis, Campionat dau mond dau Palhasso, festenau Vocàlia dals Palhons, Fèsta d’Occitània, Sansonhaa au Bròc, creacion a Nissa de la Dictada Occitana…).
Enfin, Nissa Pantai es tanben conoissuda per lo sosten que li portava Ben Vautier. La sieu escritura celèbra illustra lo lògo de Ràdio Nissa Pantai, e dei malhetas que vende l’associacion. L’artista Ben partejava la dimension occitanista de Nissa Pantai qu’escàmbia emb un molon d’organismes que practican l’occitan.
L’associacion Nissa Pantai patisse una baissa de mitan de subvencion, un refut dei nòstri prestacions d’animacion a Cimier e aüra un refut de banc au Festin dei Mais a Cimier.
En reaccion au prejudici subit en seguida a la rompedura d’egalitat de tractament decidit per lo juride seleccion dau Festin dei Mais a Cimier, l’associacion, per l’intermediari dau sieu president Ciril JOANIN, a engatjat un recors.