Lo dijòus 28 de setembre a 20 oras a la glèia abatiala de Sant Pòns (COU Pastor 2) a Nissa si debanerà un concèrt en l’onor de la Dedicion de Nissa a Savòia e en sosten a l’escòla Calandreta en nissart.
Aquesto concèrt es organizat per lo Paire Gèli FLORINI, curat de la novèla parroquia Sant Carles de Focauld. Au programa d’aquesto concèrt de cants e musicas tradicionali locali:
- Lu Misteriós (Nissa Pantai), qu’interpreteràn sota la direccion de Pèire FANTIN per lo cant e Ciril JOANIN per la música, de cançons dau País Nissart e Alpenc e de Lemosin, especialament una creacion de Nicòla DUCOUSSO intitulada « Lo Palhasso ».
- Taca d’Òli, un grop animat da Francesa MARCHETTI dau Còro de Berra e que prepauerà de cants religiós en italian mas tanben de Coarasa e de la montanha gavòta.
- Li Votz de Nissa, dirigidi per Aubèrt TOSAN, e que presenteràn de cants de Raol NATHIEZ dau Sorgentin, de Jànluc SAUVAIGO, d’Aubèrt TOSAN e de Maurís SGARAVIZZI.
Lo concèrt s’acaberà per l’imne « Nissa la Bèla » de Menica RONDELLY que lu grops canteràn toi ensems.
Seràn presents au concèrt Fabrizio NUCERA GIAMPAOLO, president de la Croce Reale a Turin e Serge ROUSSEAU, representant de l’Estat de Savòia Nacion Sobeirana.
Lo 28 de setembre dau 1388, lo còmte Amedeu lo 7n de Savòia recevia li claus de Nissa e de la sieu vigueria dai sieus quatre cònsols, davant l’abadia de Sant Pòns. Nissa, ensin que li viguerias dau Puget Tenier, de Suspèr, de Val de Lantòsca e de Barciloneta passèron doncas dau Comtat de Provença au Comtat de Savòia. Aquesto cambiament de sobeiranetat cambièt la destinada de Nissa, la virèt mai devèrs la montanha e li permetèt de fabregar la sieu originalitat.
Per tota informacion, podètz contactar Cristòu DAURORE:
- Per telefonin au 06 71 18 61 32
- Per corrièl a daurore@orange.fr