NISSA PANTAI
Centre Cultural Occitan
País Nissart e Alpenc
Associacion Lei 1901
Despí dau 1971
Nissa Pantai, cen qu’es?
Nissa Pantai es una associacion Lei 1901, creada en lo 1971 e dont lo president fondator siguèt Alan Pelhon. Nissa Pantai amassa toi lu estatjants de Nissa e dau sieu comtat per lo mesme amor dau país e lo mesme desir de l’aparar. Es dubèrta a toti e a toi sensa distincion d’atge, de profession, de religion e d’opinion publica.
Que son li sieus tòcas?
Nissa Pantai entende defendre e promòure d’entre la populacion locala la cultura occitana sota toi lu sieus aspèctes, l’usança e l’amor dei dialèctes de la lenga occitana e mai particularament dau nissart e de l’alpenc.
Que son li sieus revendicacions?
Volèm viure e trabalhar au país en parlant l’occitan, la lenga nòstra!
Parlar la lenga nòstra es un drech tant important coma aqueu de viure dignament au país dont siam nascuts ò installats, sensa aver da besonh de partir cercar fortuna dins lo nòrd de França.
Nissa Pantai assume una posicion ambicioa pertocant la lenga nòstra:
- La lenga occitana (nissarda e alpenca) es un instrument de comunicacion modèrne. A pas vocacion de si limitar ai domenis dau folclòre e de la tradicion.
- Es l’afirmacion d’una identitat culturala fòrta. Exprime lo biais de viure d’un pòble, li sieus tradicions e costumas, lu rapòrts umans, una mentalitat, un biais de pensar, una arquitectura, …
- L’emparar, es un biais de la si tornar apropriar e s’afranquir de la « vergonha » transmesa ai nòstres ancians per l’escòla de la Republica jacobina.
- Es tanben un acte militant en favor de la lenga, la cultura, l’art de viure, li campanhas e lo teissut economic e social dau País Nissart e Alpenc, part integranta de l’Occitània granda.