Nissa Pantai organiza mentre de l’annada de festins culturals dont lu mai emblematics son lo Vocàlia dals Palhons e la Fèsta d’Occitània que li es ligada.
Vocàlia dals Palhons
En lo 2019, Nissa Pantai lancèt lo Vocàlia dals Palhons. La tòca èra de crear un festenau occitan de cant tradicional per remplaçar lo Festi’Cant que si faguèt pas aquela annada. Despí, lo festenau es intrat dins l’activitat regulara de Nissa Pantai e s’es diversificat.
Lo Vocàlia dals Palhon si debana cada an a la fin de setembre. Prepaua divèrsi manifestacions (ràdio, concèrts, balètis, teatre) sus tres jorns, dins diferenti comunas, especialament a Coarasa, Cantaron e Nissa.
Fèsta d’Occitània
Despí dau 1998, Nissa Pantai organiza cada an la Fèsta d’Occitània que fa viure en Vila Vielha per fin de far acapir ai gents que lu nòstres dialèctes nissart e alpenc fan part de l’occitan, una granda comunautat lingüistica rica de mai de tres milions de locutors e que s’espandisse de Mentan a Bordèu. Es l’artista Maurís Sgaravizzi que siguèt lo promier de creire an aquesta fèsta e que n’animèt li dètz promieri edicions.
La Fèsta d’Occitània si debana la darriera dimenjada de setembre au Teatre Francís Gag e marca la clavadura dau Vocàlia dals Palhons. Vos fa descurbir la riquessa culturala de l’espaci occitan a travèrs d’espectacles variats de teatre, de cant, de dança, de musica e de poesia.
Festins divèrs
Nissa Pantai participa tanben ai festins culturals mai importants de Nissa e dei comunas a l’entorn, coma:
- Lo Festin dei Cogordons,
- Lo Festin dei Mais a Cimier e dins lu quartiers,
- Lo Festin dau Botaor a Levenç,
- La Fèsta de la Cònca a Vença,
- Lo Rescòntre de Sonhaires a Barvèr…
Nissa Pantai li mèna d’animacions (atelhiers per pichoi, mandar de palhasso) e li ten lo sieu banc de libraria e produchs.
