Per lo Carneval de Nissa dau 2022, Nissa Pantai realiza lo pichin carre dei sieus 50 ans que representerà li doi bèstias totemiqui de Nissa: la ratapinhata (fàcia esconduda de Nissa) e l’aigla roja (fàcia oficiala), embai doi bandieras de Nissa e d’Occitània.

Aquesto projècte devia èstre realizat en lo 2021, mas lu carnevals oficial e independent siguèron anullats. Lo carre dei 50 ans de l’associacion a doncas un an de retardi.

La gròssa tèsta de l’aigla serà susmontada d’una corona comtala e dau nombre 50, per onorar la creacion de la nòstra associacion en lo 1971, dont lu fondators siguèron: Alan PELHON, Maurís SGARAVIZZI, Jànluc SAUVAIGO, Bernat FRUCHIER, Joan-Pèire GIRAUD, Joan CORDIER e Felip POLHON.

Aquesto pichin carre serà acompanhada dau Palhasso e d’un grop d’animators, e participerà a:

  • Carneval dei Ribas de Palhon lo divèndres 18 de febrier a 13:30 au Jardin Lécuyer a l’Ariana, Nissa,
  • Carneval de Nissa lo diménegue 20 de febrier a 14:30 per la 7a Parada Nissarda,
  • Carneval Independent de Sant Ròc lo diménegue 27 de febrier a 12:00 sus la Plaça Sant Ròc, Nissa,
  • Carneval de la Ternitat lo diménegue 6 de març a 14:30 au Baloard Suarez.

Lo nòstre carre participerà a d’autres carnevals dont vos comuniquerem li datas ulteriorament.

Per mai d’informacions, podètz contactar dirèctament Nissa Pantai:

  • Per telefòn au 06 71 18 61 21
  • Per corrièl a info@nissapantai.org

Vos convidam d’escotar Ràdio Nissa Pantai sus Internet e mai sus Androïd gràcia a la nòstra aplicacion per esmartfòns.

Daissar un comentari

Vòstra adreça de messatjariá serà pas publicada.