Nissa Pantai si ralègra de la reüssida de la Dictada Occitana que si debanèt a Nissa lo dissabta 29 de genoier au Centre Universitari Mediterranèu (CUM).
L’eveniment èra pròpi excepcional aquest an perque èra a l’encòup la 20a edicion de la Dictada Occitana a Nissa e lo 1r còup que siguèt organizada per la Vila de Nissa en partenariat emb:
- L’Associacion dei Professors de Lengas Regionali (APLR),
- La Charaïssa,
- Lo Collectiu dei Arts Tradicionals (CAT),
- La Federacion dei Associacions dau Comtat de Nissa (FACN),
- L’Institut d’Estudis Occitans 06 (IEO06),
- Nissa Pantai – Centre Cultural Occitan País Nissart e Alpenc,
- Nissart per Totjorn [Nissart per Tougiou],
- Òc-Bi Nissa.
Creada a Castras en lo 1998 per lo « Centre Occitan del País Castrés », la Dictada Occitana a per tòca de valorizar l’escrich en occitan, dins la sieu diversitat dialectala, tant dins lo sieu espaci lingüistic coma en defòra. Encuèi, si debana lo mesme jorn dins 27 vilas de França e d’Occitània tota e mai a l’estrangier, dins lu País Catalans (Barcelona, Valéncia e Balearas).
Es en lo 2003 que la Dictada Occitana siguèt creada a Nissa per lo Centre Cultural Occitan (CCÒC) País Nissart e Alpenc a la demanda dau Centre Occitan del País Castrés. L’eveniment si faguèt en doi còups: en genoier dins la sala dau Pòrt pi en octòbre au Teatre Francés Gag mentre de la 6a Fèsta d’Occitània, en preséncia de Corina LENCOU-TOSELLI, presidenta dau Centre Occitan del País Castrés, e d’Anna-Maria SGARAVIZZI-GARCIA qu’èra presidenta de l’associacion de l’escòla Calandreta de Drap.
Despí, si son tengudi 20 edicions a Nissa, dont 10 emb doi dictadas diferenti lo mesme jorn. Aquest an, lu sénhers Joan-Luc GAGLIOLO e Estan PALOMBA, de la Vila de Nissa, an capitat de far l’unitat en metent d’acòrdi toti li associacions qu’organizavan la Dictada Occitana dau sieu costat. Nissa Pantai saluda aquesta union retrobada e felicita especialament lo servici Lenga, Cultura e Tradicions Nissardi de la Vila de Nissa per aquela capitada.
A maugrat li restriccions sanitàrii ligadi a la pandèmia de la Covid19, l’amfiteatre dau CUM èra clafit tant la participacion èra granda: 150 personas de tot atge dont un trentenau d’escolanas e escolans de collègis e licèus.
Assistiguèron a l’eveniment manti personalitats de la comuna dont:
- Sénher Antòni BORRÉ, promier ajonch, que representava lo Cònsol de Nissa e President de la Metropòla Sénher Crestian ESTROSI,
- Sénher Joan-Luc GAGLIOLO, ajonch delegat a l’Educacion, au Libre, a la Lucha còntra l’illetrisme et a l’Identitat nissarda,
- Sénher Esteban MORABITO, Director dei Patrimònis a la Vila de Nissa,
- Sénher Estanislau PALOMBA, director dau servici Lenga, Cultura e Tradicions nissardi a la Vila de Nissa,
- Sénher Estèu BETTI, encargat de mission Lenga e Cultura Regionali, representant Sr Ricard LAGANIER, rector de l’Acadèmia de Nissa.
L’eveniment comencèt per lo discors dei oficials, dont Antòni BORRÉ e Joan-Luc GAGLIOLO que saludèron lo nombre important de participants e sotalinhèron l’engatjament e l’implicacion de la comuna de Nissa dins la defensa e la promocion de l’occitan nissart dins l’ensenhament e la transmission a la joventura.
Anna-Maria SGARAVIZZI, qu’animava l’eveniment, encadenèt en rengraciant lu participants e lu representants de la comuna, pi en anonciant l’autor dau tèxt de la dictada, Rogier GILLI, que pilhèt lo microfòn per començar de dictar.
Li constrenchas sanitàrii permetian pas d’organizar la dictada dins lo format de Castras, valent a dire emb li correccions dei còpias e la remesa dei prèmis. Pura, cadun recebèt lo sieu diplòma de participacion e finda de regals de la comuna e dei associacions, dont de libres (l’Armanac Nissart de la FACN, libre d’exercicis en nissart de Jan Blaquiera, “Carriera Sotrana” de Rogier Gilli) e un bilhet d’un Nissart (moneda locala).
L’eveniment siguèt mediatizat e passèt lo mesme jorn au jornal televisat dau 19/20 de France 3 Costiera d’Azur. Siguèt tanben retransmés en dirècte per la Vila de Nissa e per Ràdio Nissa Pantai que redifusa l’eveniment dins la sieu emission « La vida en la Contea ».