15a Dictaia Occitana en alpenc escareasc per li collegians

Nissa Pantai – Centre Cultural Occitan País Nissart e Alpenc organiza la 15a Dictaia Occitana en alpenc escareasc, per lis escolans de 3a dar Collègi François Rabelais de L’Escarea (95 Camin dar Castèl) lo jòus 6 de febrier 2020 a 11 orai.

Aquela Dictaia Occitana se debana egalament dins 39 vilai d’Occitània, coma a París, mas tanben a Barcelona que l’occitan i es lenga co-officiala embal catalan, o encara Palma de Malhòrca, Albocàsser e Valéncia.

Lis escorans, collegians e liceans dai corses d’occitan alpenc (sonat parier gavòt) d’Establiments Escolars de L’Escarea e Menton e d’occitan nissart de Nissa e La Trinitat auràn ua remesa de prèmis per lai sieus dictaiai dintre li sieus Establiments.

Aquela Dictaia es un juec concors dubèrt en tots e gratis per li collegians, emb de remesai de prèmis en tots li participants. Rasseguretz vos, es ren la còpia occitana de la dictaia de M. Pivot !

Lo tèxt Lo festin de L’Escarea [Lou festin de L’Escarea] de Pato BEUSEC es trach de la revista entierament en lenga occitana « Lou Ficanas » de l’annaia dar 1891, que pareissian de tèxtes en alpenc escareasc e mentonasc coma en provençal e nissart, dictat per Laurenç Revèst, professor d’occitan alpenc dins aquel Establiment Escolar.

Citam un estrach dar tèxt: « Los abates fan lai distribucions de lai cocardai emb la musica dar bal » [Lous abattes fan laï distribussions de laï coucardaï eme la musica dar bal…]. Aquel tèxt, cultural e istoric entre lis autres, permete en tots aquels qu’o vòlon e que conoisson un chícol la lenga de temptar de l’escriure, totai lai grafiai son acceptaiai.

Convivialitat e bòna umor son a l’apuntament, l’essencial es de participar, question d’etica (e d’etiqueta n’es ver)!

L’eveniment de la Dictaia serà enregistrat per Ràdio Nissa Pantai.

Per mai d’informacions, podètz contactar dirèctament Nissa Pantai:

  • Per telefòn au 06 71 18 61 21
  • Per corrièl a info@nissapantai.org

Vos convidam d’escotar Ràdio Nissa Pantai sus Internet e mai sus Androïd gràcia a la noastra nòva aplicacion per esmartfòns.