31n Campionat dau mond de mandar de Palhasso

Lo diménegue 26 de genoier a 15 oras si debanerà sus la Plaça Sant Ròc lo 31n Campionat dau Mond de Mandar de Palhasso.

Nissa Pantai vos dona apontament sus de la plaça de la glèia de Sant Ròc per vos marcar au campionat e formar de chormas de doi jugaires. La tècola dau juec es de mandar en longuesa, emb l’ajuda d’un lançòu, lo Palhasso, un òme de palha nissart, lo mai luenh possible. Lo campionat s’acaberà per un palmarès fixat per d’arbitres e serà enseguit d’una merenda nissarda.

Aquesta manifestacion esportiva es a gratis. Li chormas son formadi de doi personas e representan caduna un país existent ò imaginari. Existon 4 categorias d’atges :

  1. Categoria 1 Nenons (0 a 5 ans),
  2. Categoria 2 Pichoi (6 a 11 ans),
  3. Categoria 3 Adòs (12 a 17 ans),
  4. Categoria 4 Madurs (18 ans e mai).

Lo Campionat dau Monde de Mandar de Palhasso es una vièlha tradicion de l’An Nòu. Lo Palhasso es una mariòta qu’incarna toi lu crucis acumulats de l’an passat. Lo mandar lo mai luenh possible constitue un biais de si desbarrassar d’aquelu moments dificils passats e començar la novèla annada emb l’esperit laugier.

Aquesta manifestacion es ligada despí de la sieu creacion au Carneval Independent de Sant Ròc, previst per lo 9 de febrier a 12:00 sus la Plaça Sant Ròc. Lo recòrdi dau mond (15,30 metres de longuesa) es detengut, despí dau 2007, da la chorma de la Contea de Nissa « Lu poetas », rapresentada da Joan PICCINELLI e Romieu MARTIN. Lu recòrdis dau mond per l’ensems dei categorias son:

  • 15,30 metres (esquipa de Nissa, 2007) per la categoria 4 (madurs),
  • 6,45 metres (esquipa de França, 2016) per la categoria 3 (adòs),
  • 5,90 metres (esquipa d’Itàlia, 2016) per la categoria 2 (pichoi),

Per mai d’informacions, podètz contactar dirèctament Nissa Pantai:

  • Per telefòn au 06 71 18 61 21
  • Per corrièl a info@nissapantai.org

Vos convidam d’escotar Ràdio Nissa Pantai sus Internet e mai sus Androïd gràcia a la noastra nòva aplicacion per esmartfòns.